கர்நாடகத்தை சேர்ந்த, வங்கியில் பணிபுரிந்து ஓய்வுபெற்ற பத்மநாப ஷெட்டி என்ற முதியவருக்குப் புற்றுநோய் ஏற்பட்டது.

மாதந்தோறும் சில ஊசிகள் செலுத்திக்கொள்ள வேண்டும் என மருத்துவர்கள் அறிவுறுத்தினர்.

அதற்கான செலவைக் காப்பீட்டு நிறுவனத்திடம் கேட்டபோது, “நீங்கள் மருத்துவமனையில் அனுமதிக்கப்படவில்லை, வீட்டிலேயே ஊசி போட்டுக்கொண்டீர்கள். எனவே தொகை வழங்க முடியாது” என மறுத்துவிட்டனர்.

கோபமடைந்த ஷெட்டி, மக்கள் நீதிமன்றத்தில் (லோக் அதாலத்) முறையிட்டு வழக்குத் தொடுத்தார். விசாரித்த நீதிபதிகள், “மருத்துவமனையில் சேர்ந்து படுக்கையில் இருந்துதான் சிகிச்சை பெற வேண்டும் என்ற கட்டாயம் இல்லை; நோயாளிக்கு என்ன தேவையோ அதுவே முக்கியம்” எனக் கூறி, காப்பீட்டுத் தொகையையும் இழப்பீட்டையும் வழங்க உத்தரவிட்டனர்.

இந்தத் தீர்ப்பை ஏற்காத காப்பீட்டு நிறுவனம், விடாப்பிடியாகக் கர்நாடக உயர் நீதிமன்றத்தில் மேல்முறையீடு செய்தது.

தேவையில்லாமல் மக்களை வழக்காடி வைத்து அலைக்கழித்ததற்காகக் காப்பீட்டு நிறுவனத்திற்கு உயர் நீதிமன்றம் கடும் கண்டனம் தெரிவித்தது.

மனுவைத் தள்ளுபடி செய்த நீதிமன்றம், 30 நாட்களுக்குள் பத்மநாப ஷெட்டிக்குச் செலுத்த வேண்டிய தொகையை வழங்கவும் உத்தரவிட்டது.