ஒரு காலத்தில் உடலுக்குள் இருக்கும் கொழுப்பை வெல்ல வேண்டுமென்றால், சாப்பாட்டைக் குறைக்க வேண்டும், உடற்பயிற்சி செய்ய வேண்டும் என்றுதான் சொன்னோம்.
ஆனால் இப்போது விஞ்ஞானம் வேறு ஒரு வழியைத் தேடுகிறது.
கொழுப்புச் செல்கள் கடோத்கஜன் போல பெருத்தால்?
நம் வயிற்றுக்குள் இருக்கும் கொழுப்புச் செல்கள் பெருத்துப் பெருத்து, இடத்தை ஆக்கிரமித்து நிற்கும் கடோத்கஜன் கூட்டம் போல என்று நினைத்துப் பாருங்கள்!
அந்தக் கூட்டத்துக்குள் ஒரு ஊசி நுழைகிறது.
அது எல்லா செல்களையும் தாக்குவதில்லை. கொழுப்புச் செல்களை மட்டும் தேடுகிறது.
அவற்றுக்கு ஒரு கட்டளை கொடுக்கிறது: “இனி நீங்கள் வேண்டாம்!”
இதுதான் CBL-514 என்ற புதிய மருந்தின் பின்னால் இருக்கும் வித்தியாசமான யோசனை.
“கொழுப்பை வெறுமனே காலி செய்வதல்ல… கொழுப்புச் செல்களையே குறிவைப்பது!”
கொழுப்பை மட்டும் குறிவைக்கும் ஊசி?
CBL-514, கொழுப்புச் செல்களில் apoptosis எனப்படும் திட்டமிட்ட உயிரிழப்பு செயல்முறையைத் தூண்டுகிறது. மற்ற செல்களை பாதிக்காமல் கொழுப்புச் செல்களை குறிவைப்பதே இதன் முக்கிய நோக்கம்.
மனிதர்களில் நடத்தப்பட்ட 2ஆம் கட்ட பரிசோதனையில், மருந்து பெற்றவர்களில் 69.6% பேருக்கு எட்டு வாரங்களுக்குப் பிறகு குறைந்தது 150 மில்லிலிட்டர் அளவுக்கு தோலுக்குக் கீழே உள்ள கொழுப்பு குறைந்தது. மருந்துப்போலி பெற்றவர்களில் இந்த அளவு குறைவு காணப்பட்டவர்கள் 0%.
ஆனால் உண்மையான எதிரி வயிற்றுக்குள் மறைந்திருக்கிறது
வெளியில் தெரியும் கொழுப்பை விட கவலைக்குரியது, உள் உறுப்புகளைச் சுற்றி இருக்கும் உள்ளுறுப்பு கொழுப்பு (visceral fat).
இந்தக் கொழுப்பு இன்சுலின் எதிர்ப்புத் தன்மை, வகை 2 நீரிழிவு, மாரடைப்பு, பக்கவாதம் போன்ற பிரச்சினைகளுடன் தொடர்புடையது.
MRI பரிசோதனையில் CBL-514 பெற்றவர்களின் உள்ளுறுப்பு கொழுப்பு, சிகிச்சைக்குப் பிறகு நான்கு வாரங்களில் சராசரியாக 12.01% குறைந்தது. மருந்துப்போலி குழுவில் அது 5.68% அதிகரித்தது.
“வயிற்றின் மேல் தெரியும் கொழுப்பை மட்டும் அல்ல… உள்ளே மறைந்திருக்கும் கொழுப்பையும் குறிவைக்கிறதா?”
GLP-1 மருந்துடன் சேர்த்தால்?
விலங்கு ஆய்வுகளில் CBL-514-ஐ tirzepatide உடன் சேர்த்தபோது அதிக எடை குறைவு காணப்பட்டது. Tirzepatide நிறுத்தப்பட்ட பிறகும், இரண்டு மருந்துகளையும் பெற்ற எலிகள் குறைவாகவே மீண்டும் எடை அதிகரித்தன.
இதற்கு ஒரு காரணம் இருக்கலாம்: கொழுப்புச் செல்களின் எண்ணிக்கையே குறைந்தால், மீண்டும் கொழுப்பு சேர்வதற்கான இடமும் குறையலாம்.
இன்னும் ஒரு முக்கியமான “ஆனால்”
CBL-514 இன்னும் சந்தைக்கு வந்துவிட்ட மருந்து அல்ல. இது தொடர்ந்து மருத்துவப் பரிசோதனையில் உள்ளது.
முதல் 3ஆம் கட்ட ஆய்வு தொடங்கியுள்ளது. அதன் மூலம் இந்த மருந்து உண்மையில் எவ்வளவு பயனுள்ளதாகவும், நீண்டகாலத்தில் எவ்வளவு பாதுகாப்பாகவும் இருக்கும் என்பது தெரியவரும்.
அதாவது, கடோத்கஜன் போல பெருத்த கொழுப்புச் செல்களை உடலுக்குள் சென்று வேட்டையாடும் மருந்து என்ற கற்பனை இப்போது அறிவியல் ஆய்வின் கதவுக்குள் நுழைந்திருக்கிறது.
ஆதாரம்: European Association for the Study of Diabetes (EASD) வெளியிட்ட CBL-514 தொடர்பான ஆய்வு தகவல்கள்.
About the Author
